Liverpool náði fimm stiga forskoti - myndband

Liverpool er komið með fimm stiga forskot á toppi ensku úrvalsdeildarinnar í fótbolta eftir 3-2 útisigur á Norwich í dag. Liverpool skoraði tvö mörk snemma leiks og lifði síðan af taugaveiklaðan seinni hálfleik þar sem Norwich náði tvisvar að minnka muninn í eitt mark.

Raheem Sterling skoraði tvö mörk og lagði upp eitt mark að auki og átti flottan leik alveg eins og í sigrinum á móti Manchester City um síðustu helgi.  Þetta var ellefti deildarsigur Liverpool-manna í röð.

Liverpool hefur nú fimm stigum meira en Chelsea og níu stigum meira en Manchester City sem á tvo leiki inni á Liverpool.

Norwich-liðið stríddi Liverpool-liðinu mikið í seinni hálfleiknum en toppliðið hélt út og tryggði sér gríðarlega mikilvægan sigur.

Liverpool fékk algjöra draumabyrjun í leiknum þegar Raheem Sterling skoraði fyrsta markið strax á fjórðu mínútu með frábæru langskoti eftir að hafa fengið nægan tíma til að leggja boltann fyrir sig.

Raheem Sterling lagði síðan upp annað mark fyrir Luis Suarez sjö mínútum síðar en Sterling stakk boltanum þá fram fyrir hlaup hjá Úrúgvæmanninum sem skoraði af mikilli yfirvegun rétt utan markteigs.

Það leit út fyrir öruggan Liverpool-sigur í hálfleik en Norwich-menn tóku hinsvegar öll völd í upphafi síðari hálfleiks. Liverpool lenti í miklum vandræðum sem endaði með því að Gary Hooper minnkaði muninn á 54. mínútu eftir slæm mistök Simon Mignolet, markvarðar Liverpool.

Það virtist vera að stefna í aðra eins skyndi-endurkomu og hjá Manchester City á móti Liverpool um síðustu helgi en Liverpool virtist vakna af værum blundi eftir mark Hooper.

Raheem Sterling ætlar að reynast Liverpool-liðinu dýrmætur á lokasprettinum en hann kom liðinu í 3-1 á 64. mínútu með sínu öðru marki í leiknum. Sterling vann boltann og keyrði upp að teignum þar sem hann hafði aðeins heppnina með sér þegar boltinn fór af varnarmanni Norwich og yfir John Ruddy í marki Norwich.

Norwich-menn gáfust hinsvegar ekkert upp og Robert Snodgrass minnkaði muninn í 3-2 á 77. mínútu með góum skalla eftir fyrirgjöf frá Martin Olsson. Þetta setti mikla spennu í lokamínútur leiksins en Liverpool hélt út og fagnaði sigri í ellefta deildarleiknum í röð.