Sýndartölvur i grunnskólum Seltjarnarness

Seltjarnarnesbær hyggst setja upp sýndartölvur í kennslustofum í grunnskólum bæjarins.

Alls verða settar upp 56 sýndartölvur í Mýrarhúsaskóla og Valhúsaskóla. Þetta kemur fram í tilkynningu frá Nýherja sem sér um verkefnið í samvinnu við Seltjarnarnesbæ.

Með sýndarvélum geta kennarar dreift og miðlað kennsluefni til nemenda í kennslustundum í gegnum eina móðurtölvu.

Sýndartölvur eru ekki með stýrikerfi, diska, minni eða örgjörva og eru einungis birtingalag fyrir gögn. Öll vinnsla, kerfi, þjónusta og hugbúnaður fer fram á netþjóni og því fara engin gögn úr kerfisrýminu.

„Með sýndarvélum er hægt að dreifa upplýsingum og gögnum með markvissum hætti og auka skilvirkni, til dæmis í kennslutímum. Þá er rekstrarkostnaður við slíkan búnað lægri, skólar þurfa ekki að greiða neinn upphafskostnað fyrir vélbúnað og leyfisgjöld eru lægri. Þannig er hægt að endurnýja tölvubúnað hraðar en áður. Sýndarvélar eru því ódýrari kostur fyrir stofnanir og fyrirtæki,“ segir Anton M. Egilsson lausnaráðgjafi hjá Nýherja.