Katrín tekur slaginn

Katrín Jakobsdóttir, menntamálaráðherra og þingmaður Vinstrihreyfingarinnar - græns framboðs, hefur ákveðið að gefa kost á sér í formannsembætti flokksins á landsfundi um næstu helgi.

Katrín hefur verið varaformaður hreyfingarinnar frá hausti 2003 og setið á þingi síðan 2007.

„Undanfarin fjögur ár hef ég gegnt embætti mennta- og menningarmálaráðherra í ríkisstjórn Vinstri-grænna og Samfylkingar en á því kjörtímabili hefur verið unnið ötullega að því að reisa landið við eftir efnahagshrunið 2008," segir Katrín. „Næsta kjörtímabil er verk að vinna við að bæta kjör almennings á grunni sjálfbærs samfélags."

Steingrímur J. Sigfússon, formaður Vinstrihreyfingarinnar - græns framboðs, tillkynnti í gær að hann myndi ekki gefa kost á sér í embættið á næsta landsfundi.

„Kynslóðaskipti og endurnýjun eru nauðsynleg í stjórnmálastarfi sem annars staðar. Því met ég það svo að nú sé tímabært fyrir Vinstrihreyfinguna – grænt framboð að ráðast í breytingar að þessu leyti og sjálfur horfi ég til þess fullur tilhlökkunar að halda baráttunni áfram að baki nýrri forustu,“ sagði Steingrímur á blaðamannafundi í Norræna Húsinu í gær.