"Við teljum að málið sé komið í öngstræti"

Framsóknarmenn eru tilbúnir að styðja að einstakar breytingar verði gerðar á stjórnarskránni fyrir kosningar en síðan verði vinnu við stjórnarskrárbreytingar haldið áfram á næsta kjörtímabili. Þetta segir Sigurður Ingi Jóhannsson, varaformaður Framsóknarflokksins.

Framsóknarmenn eru tilbúnir að styðja breytingar á stjórnarskránni núna ef þar verða inni ákvæði um auðlindir í þjóðareign og ákvæði um beint lýðræði.

Framsóknarmenn höfðu það sem eitt af sínum helstu stefnumálum fyrir kosningarnar 2009 að breyta stjórnarskránni með stjórnlagaþingi. Skiptar skoðanir eru hins vegar um í hvaða farvegi málið er nú.

Næsti þingfundur er á þriðjudag en dagskrá þingsins hefur ekki verið birt. Og því óvíst hvenær önnur umræða um stjórnarskrármálið hefst.

Sigurður Ingi Jóhannsson, varaformaður Framsóknarflokksins, segir að flestir flokkar hafi talað um mikilvægi þess að halda ákvæði um auðlindir í þjóðareign inni í frumvarpinu. Sigurður Ingi segir einnig að framsóknarmenn séu tilbúnir að styðja breytingar á einstökum ákvæðum.

„Við bendum á það sem við bentum á í byrjun janúar, að við teljum að málið sé komið í öngstræti og margir stjórnarliðar viðurkenna það. Það er vilji til að setjast niður yfir ákveðnum ákvæðum, finna lausnir og halda síðan áfram á næsta kjörtímabili," segir Sigurður Ingi.

Sp. blm. Að ljúka vinnu í einstökum ákvæðum núna og ljúka síðan þessari vinnu á næsta kjörtímabili?

„Já, það er það sem við höfum bent á og samþykktum á okkar flokksþingi um daginn. Í þeim efnum bendum við sérstaklega auðlindaákvæðið og aukið beint lýðræði."