Konurnar tengjast manninum fjölskylduböndum

Karlmaðurinn sem handtekinn var fyrir helgi af lögreglunni á Vestfjörðum er grunaður um langvarandi og alvarleg kynferðisbrot gegn að minnnsta kosti fjórum stúlkum. Þær tengjast honum allar fjölskylduböndum.

Maðurinn, sem er á sjötugsaldri og búsettur á Þingeyri, var handtekinn á föstudaginn en þá höfðu fjórar kærur verið lagðar fram dagana áður. Húsleitir voru gerðar á heimili hans og vinnustað. Kærurnar eru lagðar fram af þremur systrum og frænku þeirra en þær eru allar fjórar systkinabörn konu mannsins en fjölskyldur þeirra voru nákomnar á árum áður.

Brotin voru framin þegar konurnar voru börn að aldri en þær eru nú á aldrinum 18 - 35 ára og því möguleiki á að eitthvað af brotunum sem kærð voru séu fyrnd.

Samkvæmt heimildum fréttastofu er hins vegar um alvarleg og langvarandi brot að ræða. Sömu heimildir herma að fleiri konur íhugi að stíga fram og kæra manninn fyrir sams konar brot en hann hefur neitað sök í yfirheyrslum hjá lögreglu.