Gistinóttum í júli fjölgaði um 8% milli ára

Gistinætur á hótelum í júlí voru 286.200 samanborið við um 263.800 í júlí 2012. Gistinóttum fjölgaði því um 8% milli ára. Þetta kemur fram í tölum frá Hagstofu Íslands.

Þar segir að gistinætur erlendra gesta voru 90% af heildarfjölda gistinátta í mánuðinum, sem var aukning um 9 prósent frá júlímánuði 2012.

Þegar tölur yfir einstaka landshluta eru skoðaðar sést að gistninætur á hótelum höfuðborgarsvæðisins voru 163.500, sem er aukning um 6 prósent frá sama mánuði í fyrra. Á Suðurlandi voru 43.200 gistinætur í júlí samanborið við 40.200 í júlí 2012. Á Austurlandi fjölgaði gistinóttum um 3 prósent milli ára, en þær fóru úr 16.600 í 17.200. Á Norðurlandi voru 30.5000 gistinætur í júlímánuði, sem er 8 prósenta aukning miðað við júlí 2012. Á samanlögðu svæði Vesturlands og Vestfjarða voru gistinæturnar 17.700 talsins, sem er 23 prósenta aukning frá júlí í fyrra. Að lokum voru gistinætur á Suðurnesjum 14.100, sem er um 38 prósenta aukning milli ára.

„Gistinætur á hótelum fyrstu sjö mánuði ársins 2013 voru 1.217.500 til samanburðar við 1.041.750 fyrir sama tímabil árið 2012. Gistinóttum erlendra gesta hefur fjölgað um 15% samanborið við sama tímabil 2012 á meðan gistinóttum Íslendinga hefur fjölgað um 10%," segir á heimasíðu Hafstofu Íslands.

Taka ber fram að hér er eingöngu átt við gistinætur á hótelum sem opin eru allt árið. Tölurnar segja því ekki til um gistinætur á gistiheimilum né hótelum sem eingöngu eru opin yfir sumartímann.