Starfsmenn Kaupþings tóku stöðu gegn krónunni

Nokkrir háttsettir menn hjá Kaupþingi fyrir hrun tóku stöðu gegn krónunni áður en hún féll í mars árið 2008. Veftímaritið Kjarninn birti í dag skýrslu sem endurskoðunarfyrirtækið PwC vann fyrir slitastjórn Kaupþings.

Í rannsóknarskýrslu Alþingis kemur fram að stöðutaka Kaupþings og stærstu vildarviðskiptavina hans gegn krónunni hafi valdið falli hennar.

Í Kjarnanum í dag kemur fram stöðutaka einstaka starfsmanna gegn krónunni hafi einnig gert það. Til dæmis hafi sumir starfsmenn selt hlutabréf í bankanum á sama tíma og verið var að hvetja viðskiptavini í eignastýringu eða í einkabankaþjónustu bankans til að kaupa slík bréf.

Starfsmennirnir hafi hagnast um hundruð milljóna, sem sátu eftir á bankareikningum þeirra þegar bankahrunið felldi íslenska fjármálakerfið, að því er segir í Kjarnanum. Veftímaritið nefnir fjóra starfsmenn sem hafi tekið þátt í þessu.

Þá Ingvar Vilhjálmsson, framkvæmdastjóra markaðsviðskipta, sem hafi hagnast um hálfan milljarð króna, Hannes Frímann Hrólfsson, aðstoðarframkvæmdastjóra markaðsviðskipta, sem hagnaðist um hátt í 158 milljónir króna á stöðutökunni, Steingrím Pál Kárason, framkvæmdastjóra áhættustýringar og Þórarinn Sveinsson, framkvæmdastjóra eignastýringar og einkabankaþjónustu sem hagnaðist um hátt í hálfan milljarð króna.

Í Kjarnanum kemur einnig fram að veftímaritið hafi leitað sér upplýsinga um hvort að verið væri að skoða viðskipti starfsmannanna fjögurra sem lögbrot.

„Svo er ekki. Embætti sérstaks saksóknara kannaði það ítarlega fyrir nokkrum árum hvort stórar stöðutökur gegn krónunni væru glæpsamlegar. Á meðal þess sem var kannað var hvort hægt væri að flokka þær sem fjársvik, þar sem almenningur, sem þarf að lifa við hina föllnu krónu sem stöðutökurnar orsökuðu, væri sá sem hefði verið svikinn. Niðurstaða embættisins varð hins vegar sú að frelsi í gjaldmiðlaviðskiptum hefði einfaldlega verið það mikið á árunum fyrir hrun að líkast til væri ekkert ólöglegt fyrir stöðutökurnar,“ segir í Kjarnanum. 

Nánar má lesa um málið á Kjarninn.is.