Örvar var hetja segir lögreglan

Örvar Arnarson, annar mannanna sem lést í fallhlífarstökkslysi á Flórída á laugardag, gerði allt sem hann gat til að bjarga Andra Má Þórðarsyni, sem einnig lést. Þetta sýnir upptaka úr myndavél á hjálmi Örvars. „Hann var hetja. Hann dó hetja,“ segir William Lindsey, fulltrúi lögreglustjórans í Paco-sýslu í Flórída.

Á upptökunni sést að Andra tókst ekki að opna fallhlíf sína, en óljóst er hvort hann var með meðvitund eða ekki. Þar sést hvernig Örvar, sem var mjög reyndur fallhlífastökkvari, reyndi að bjarga lífi Andra með því að toga í strenginn á fallhlíf hans, án árangurs.