Háskólanum gert að rétta hlut nemanda

Umboðsmaður Alþingis hefur komist að þeirri niðurstöðu að 15 prósenta álag á skrásetningargjald í Háskóla Íslands, sé það greitt eftir eindaga, sé ekki í samræmi við lög um opinbera Háskóla.

Mál þetta barst umboðsmanni árið 2011, eftir að nemandi kvartaði til hans yfir því að álag þetta var lagt á vegna þess að skrásetningargjald var greitt einum degi eftir eindaga. Eins segir umboðsmaður að ekki sé nægjanlegt að í reglum fyrir Háskólann komi aðeins fram að háskólaráð staðfesti nánar reglur er lúta að skráningargjaldi og þær séu ekki birtar í B-deild Stjórnartíðinda. Umboðsmaður Alþingis beinir því þeim tilmælum til HÍ að rétta hlut nemandans.

María Rut Kristinsdóttir formaður stúdentaráðs segir ráðið ekki hafa tekið afstöðu til málsins. „Þetta sýnir enn og aftur að það er gott þegar stúdentar kanna rétt sinn, því margir þeirra átta sig ef til vill ekki á lagaumgjörð Háskólans. Það var flott hjá þessum nemanda að gera það og fá þessa niðurstöðu. Við í stúdentaráði munum fylgja því eftir að Háskólinn muni ekki gera þetta aftur,“ segir María.

Til stendur að hækka skrásetningargjöld í HÍ um 15 þúsund krónur annað árið í röð, svo það verði 75 þúsund krónur, og á það að skila 140 milljónum króna til Háskólans. María Rut segir þó ljóst að einungis 39 milljónir muni skila sér til skólans og afgangurinn muni fara í að mæta niðurskurði. „Ég sem stúdent gæti sætt mig við að greiða 75 þúsund krónur fyrir árið ef ég vissi að það myndi auka gæði námsins, en það er mjög fúlt að nemendur þurfi að greiða fyrir niðurskurðinn.“