Kröfur Kínverja varðandi fjárfestingu á Flúðum algerlega óaðgengilegar

Aðstandendur uppbyggingar heilsuþorps á Flúðum segja að kröfur kínverskra fjárfesta sem lýstu áhuga á verkinu hafa verið óaðgengilegar og víti til varnaðar. Kínverjarnir kröfuðst meðal annars að þeir eignuðust hluta þess lands sem heilsuþorpið átti að rísa á.

Árni Gunnarsson fyrrverandi alþingismaður og Gestur Ólafsson arkitekt og skipulagsfræðingur skrifa grein í Morgunblaðið í dag um tilraunir þeirra og fleiri til uppbyggingar heilsuþorps á Flúðum. Hrunamannahreppur lagði verkefninu til landssvæði  og skipulag var gert í samstarfi við bandaríska stofnun sem sérhæfir sig í úttekt á vistvænum og sjálfbærum verkefnum, sem síðar kom reyndar í ljós að var einnig í eigu Kínverjanna að sögn Árna.

Viðræður hófust við kínverskt fyrirtæki, CSST, um fjárfestinguna og þar með hófst þrautarganga að sögn þeirra Árna og Gests. Árni segir að á vissan hátt hafi Kínverjarnir dregið þá á asnaeyrunum.

„Það sem var eiginlega verst í þessu var að þeir lýstu því yfir að þeir væru reiðubúnir að setja 34 milljónir dollara í verkefnið og staðfestu það í símaviðtölum og með tölvupósti,“ segir Árni. En svo hafi tíminn liðið án þess að nokkuð gerðist en á meðan hafi tilraunum til að fá aðra fjárfesta að mestu verið hætt.

„Og ekkert gerðist og svo þegar við kröfðum þá svara fengum við þau svör að þeir gerðu þær kröfur að þarna yrðu kínverskir verkamenn, kínversk verkstjórn  og að verulegt magn af byggingarefni yrði flutt inn frá Kína og fleira kom til,“ segir Árni. Meðal ananrs að þeir fengju veð í landinu og að þeir eignuðust hluta af því. Þetta hafi verið óaðgengilegar kröfur.

„Það er ekki nokkur leið að verða við þessu. Þetta er alveg fáránlegt. Bara það eitt að fara fram á að hafa hér kínverska verkamenn á sama tíma og hér er 6 – 7 prósenta atvinnuleysi, kemur auðvitað ekki til greina,“ segir Árni.

Þá hafi Kínverjarnir ekki komið hreint fram þvi bandarískt fyrirtæki sem Heilsuþorpið var í samskiptum við hafi reynst vera dótturfélag CSST. Árni vill ekki útiloka samstarf við Kínverja almennt. Annað kínverkst fyrirtæki hafi síðast í morgun lýst áhuga á að fjárfesta í heilsutengdri ferðamennsku. Ísland hafi þar allt fram að færa.

„Þetta er sá ferðaiðnaður sem gefur lang mest í aðra hönd. Þetta er sá ferðaiðnaður sem fer núna hraðar vaxandi vestur í Bandaríkjunum en nokkur önnur grein ferðaiðnaðar,“ segir Árni.