Drög lögð að uppbyggingu

Yfirlýsing um samstarf ríkisins við Norðurþing, Hafnarsjóð Norðurþings og þýska iðnfyrirtækið PCC vegna áforma um uppbyggingu kísilvers á Bakka við Húsavík var undirrituð í gær. Einnig var undirritað samkomulag milli Norðurþings, Hafnarsjóðs Norðurþings og íslenska ríkisins um ýmsar aðgerðir til atvinnuuppbyggingar á Bakka.

Steingrímur J. Sigfússon, atvinnuvega- og nýsköpunarráðherra, undirritaði yfirlýsinguna fyrir hönd ríkisins en hann mun á næstunni leggja fram tvö frumvörp á Alþingi þessu tengd.

Í fréttatilkynningu kemur fram að annað frumvarpið geri ráð fyrir að ráðherra verði veitt heimild til að gera fjárfestingarsamning um byggingu kísilvers á Bakka. Hitt frumvarpið er lagt fram til að afla heimilda fyrir ríkið til að kosta uppbyggingu innviða sem eru nauðsynleg forsenda verkefnisins, einkum vegtengingu milli hafnarinnar og iðnaðarsvæðisins á Bakka og stækkun Húsavíkurhafnar.