Opnað hefur verið fyrir tilnefningar til Samfélagsverðlauna Fréttablaðsins á vefnum Vísir.is (visir.is/samfelagsverdlaun) en verðlaunin verða veitt í áttunda sinn í apríl. Sem fyrr er hægt að tilnefna til verðlaunanna í fimm flokkum.
Í flokknum Hvunndagshetja koma til greina einstaklingar sem hafa sýnt óeigingirni í tengslum við einn atburð eða með vinnu að ákveðnum málaflokki í lengri tíma. Í flokknum Frá kynslóð til kynslóðar er leitað að kennurum eða öðrum uppfræðurum. Þá koma einnig til greina félagasamtök sem sinna börnum af metnaði. Til atlögu gegn fordómum er flokkur einstaklinga eða félagasamtaka sem með starfi sínu stuðla að því að draga úr fordómum í samfélaginu. Heiðursverðlaun eru veitt fyrir ævistarf sem stuðlað hefur að betra samfélagi.
Samfélagsverðlaun Fréttablaðsins eru veitt félagasamtökum sem vinna framúrskarandi mannúðar- eða náttúruverndarstarf og hafa lagt sitt af mörkum til að gera íslenskt samfélag betra. Í þessum flokki nema verðlaunin 1,2 milljónum króna.
„Nú óskum við eftir því að lesendur okkar líti í kringum sig í leit að góðum verkum því þau eru sannarlega til víða. Því fleiri tilnefningar, þeim mun betra og meiri fjölbreytni,“ segir Steinunn Stefánsdóttir, aðstoðarritstjóri Fréttablaðsins, en hún stýrir starfi dómnefndar sem tekur við og velur úr innsendum tilnefningum.
