Þörf á hertari eftirliti með bótasvikum

Bótasvik í almannatryggingakerfinu eru afar sjaldan kærð til lögreglu og greiðsluþegi hefur aldrei hlotið dóm fyrir slíkt brot. Talið er að svikin hafi numið allt að þremur komma fjórum milljörðum króna árið tvö þúsund og ellefu. Forstjóri Tryggingastofnunar segir það vera nokkuð ljóst að Íslendingar eigi langt í land í þessum efnum, þá sérstaklega í samanburði við Norðurlöndin.

Þetta kemur fram í nýlegri skýrslu Ríkisendurskoðunar um bótasvik hér á landi. En stofnunin leggur jafnframt til að viðurlög við bótasvikum verði hert. Talið er að svikin séu flest tengd upplýsingagjöf fólks um búsetu, hjúskaparstöðu og tekjur.

„Systurstofnanir okkar á norðurlöndum hafa lagt mikla áherslu á að ytra eftirlit með bótagreiðslum sé virkt og eflt. Það hafa verið gerðar miklar úrbætur í þessum málum, sérstaklega í Noregi og Svíþjóð en við eigum nokkuð langt í land í þessum efnum," segir Sigríður Lillý Baldursdóttir, forstjóri Tryggingarstofnunar.

Fram kemur í skýrslu Ríkisendurskoðunar að greiðsluþegi hafi aldrei hlotið dóm fyrir bótasvik.

„Við höfum falið lögreglu að rannsaka nokkur mál en þau hafa ekki verið leidd til lykta. Í nokkrum skiptum höfum við séð ástæðu til að kæra en við bíðum eftir niðurtöðu rannsókna."

Sigríður Lillý segir Tryggingastofnun vera meðvitaða um þennan vanda.

„Við erum að taka inn um hundruð milljónir á hverju ári og í raun sjáum við ekki botns í því. Við fögnum auðvitað skýrslu Ríkisendurskoðunar. Hún bendir á ýmislegt sem betur mætti skoða."