Kallað eftir ábyrgð forystumannanna

Stefanía Óskarsdóttir stjórnmálafræðingur segir að sú ákvörðun Steingríms J. Sigfússonar að hætta sem formaður VG komi sér á óvart, en þó ekki að öllu leyti. Steingrímur ætlar að gegna þingmennsku áfram.

„Það eru ekki nema tveir dagar síðan Steingrímur sagði að það væri ekkert annað í pípunum en að hann byði sig fram og enginn annar hefði lýst yfir framboði, segir Stefanía og vísar þar í viðtal við Steingrím í tíufréttum Ríkissjónvarpsins á fimmtudagskvöld. „En auðvitað veit maður að það hefur verið bullandi ágreiningur í flokknum. aldrei fyrr hafa jafn margir yfirgefið þingflokk eins og á þessu kjörtímabili," segir Stefanía.

Stefanía bendir á að kallað hafi verið eftir ábyrgð forystumanna stjórnarflokkanna eftir að dómurinn í Icesave-málinu féll. Kallað hafi verið eftir ábyrgð á þeim samningum sem voru gerðir, en þjóðin felldi í tveimur þjóðaratkvæðagreiðslum. Jóhanna var búin að tilkynna fyrir að hún myndi hætta og það búið að kjósa nýjan formann í Samfylkingunni," segir hún. Steingrímur J. hafi ekki brugðist við með sama hætti og Jóhanna fyrr en nú.

Líklegt þykir að Katrín Jakobsdóttir muni gefa kost á sér í formannsembættið. Stefanía segir að mikilvægt verði fyrir flokkinn að hafa jafnvægi í flokksforystunni til að skapa frið og sátt í flokknum.