Nielsen ætlar að gera AGK aftur að stórveldi

Þó svo hrunið hafi farið illa með skartgripakónginn danska, Jesper Nielsen, og að lið hans, AGK, hafi farið á hausinn er hann ekki af baki dottinn.

AGK fór á hausinn fyrir rúmu ári síðan. Leiktíðina á undan komst liðið í undanúrslit Meistaradeildarinnar og var ekki fjarri því að komast í úrslit. Fjölmargir Íslendingar tóku þátt í þessu ævintýri Nielsen sem vakti mikla athygli í handboltaheiminum.

Nielsen er ekki sáttur við þessi endalok og þá meðferð sem hann hefur fengið.

"Þegar þessum árásum á Nielsen-fjölskylduna linnir þá lofa ég ykkur því að AGK muni koma til baka, sterkari en aldrei fyrr. Ég mun gera liðið aftur að einu því besta í Evrópu," skrifaði Nielsen á Facebook-síðu sína.

Verður áhugavert að sjá hvort honum takist að standa við stóru orðin.