Fordæmalausri misnotunarrannsókn lokið

Lögreglan á Akranesi hefur lokið rannsókn á máli 82 ára bónda á Snæfellsnesi sem grunaður er um að hafa beitt þroskaskerta stjúpdóttur sína grófu kynferðislegu ofbeldi um áratugaskeið.

„Þetta hefur verið mjög umfangsmikil rannsókn,“ segir Jónas H. Ottósson rannsóknarlögreglumaður, sem fékk málið upp í hendurnar í janúar á þessu ári og hefur því haft það til skoðunar, með öðru, í tíu mánuði. Málið kom upp eftir að ófeðruð dóttir konunnar uppgötvaði að maður hennar hefði beitt tengdamóður sína kynferðisofbeldi um nokkurn tíma.

Við skýrslutökur af konunni vegna þess máls greindi hún frá ofbeldinu sem hún hafði mátt þola af hálfu stjúpföður síns fyrrverandi, og raunar tveggja bræðra hans líka. Þeir létust báðir 2003.

Tengdasonurinn gekkst við brotunum og dóttir konunnar sleit við hann samvistir. Hann hefur nú verið ákærður.

Aldraði stjúpfaðirinn fyrrverandi hefur hins vegar alla tíð neitað sök. Hann sætti gæsluvarðhaldi vikum saman og var síðan með dómsúrskurði bannað að nálgast stjúpdóttur sína. Nálgunarbannið er enn í gildi.

Lögreglan sendi raunar málið til ákærumeðferðar fyrir nokkrum vikum en það var endursent og farið fram á frekari rannsókn á heilsufari og sjúkrasögu hins grunaða. Henni er nú lokið og má búast við að ákæruvaldið taki sér einn til tvo mánuði til að meta málavexti og hvort gefa skuli út ákæru.

Rannsóknin á sér engin fordæmi hjá embættinu, að sögn Jónasar, sem hefur tekið skýrslu af á öðrum tug manna vegna málsins.