Við höfum tekið vel til eftir Tékkaleikinn

 Kvennalandslið Íslands hefur leik í undankeppni Evrópumótsins gegn Finnum í kvöld. Frakkar og Slóvakar eru hinar þjóðirnar í riðlinum en tvö efstu liðin tryggja sér sæti í lokakeppninni í Króatíu og Ungverjalandi í desember 2014.

„Finnar hafa litla reynslu og hafa ekki komist á stórmót. Við þurfum samt að bera virðingu fyrir þeim,“ segir landsliðsþjálfarinn Ágúst Jóhannsson. Hann segir mikilvægt að byrja keppnina vel en ljóst er að Finnar eru slakasta liðið í riðlinum, að minnsta kosti á pappírnum fræga.

„Við höfum skoðað leik liðsins á myndbandi og aflað upplýsinga. Við ætlum að mæta af fullum krafti og taka fast á þeim.“

Nokkuð er um forföll í íslenska liðinu og hópurinn nokkuð breyttur frá því sem verið hefur undanfarin ár. Dagný Skúladóttir hefur lagt skóna á hilluna, Hrafnhildur Skúladóttir var ekki valin, Rakel Dögg Bragadóttir hefur verið meidd, sömuleiðis Þorgerður Anna Atladóttir, og Anna Úrsúla Guðmundsdóttir er nýbyrjuð að spila eftir barnsburð. Þá heltist Ásta Birna Gunnarsdóttir úr lestinni í vikunni vegna meiðsla og Florentina Stanciu er veik. Óvíst er um þátttöku hennar í leiknum í kvöld.

„Eðlilegt er að á einhverjum tímapunkti verði endurnýjun í landsliðinu. Ég vel þá leikmenn sem ég tel vera besta hverju sinni. Alveg sama hversu gamlar þær eru,“ segir Ágúst. Ekki sé verið að loka neinum dyrum.

Aldrei fleiri spilað erlendis

„Samkeppnin er meiri en verið hefur. Það kemur meðal annars til af því hve margir leikmenn eru að spila í sterkum deildum ytra.“ Níu leikmenn í hópnum eru á mála hjá erlendum félögum. Þeirra á meðal eru Ramune Pekarskyte, Karen Knútsdóttir og Stella Sigurðardóttir sem kynnt var til sögunnar sem nýr fyrirliði liðsins í gær.

„Stella hefur spilað gríðarlega vel með SönderjyskE þótt úrslitin hafi ekki verið að falla með okkur. Hún hefur heilt yfir verið okkar besti leikmaður.“

Stellu, sem spilað hefur í stöðu hægri skyttu með danska liðinu vegna meiðsla örvhentrar skyttu liðsins, líst vel á nýja ábyrgð.

„Það er mjög mikill heiður að vera fyrirliði svona flotts hóps. Ég er mjög spennt fyrir að taka við af Hröbbu og Rakel sem hafa verið frábærir fyrirliðar.“

Úrslitin gegn Tékkum voru sjokk

Íslenska liðið steinlá í tveimur umspilsleikjum gegn Tékkum í júní. Liðið tapaði fyrri leiknum heima með tólf mörkum sem var mikið áfall enda talið að stelpurnar okkar ættu fína möguleika.

„Úrslitin voru gríðarleg vonbrigði og sjokk fyrir okkur öll. Við höfum tekið vel til í okkar hlutum, bæði við þjálfararnir og leikmennirnir,“ segir Ágúst. Reikna megi með breyttum áherslum í varnarleiknum og einu til tveimur atriðum í sóknarleiknum. Hann minnir þó á að liðið hafi fyrst æft á mánudaginn og því skammur tími til breytinga.

Leikur Íslands og Finnlands hefst í Vodafone-höllinni á Hlíðarenda klukkan 19.30. Ágúst treystir á góðan stuðning áhorfenda og hvetur foreldra til að mæta með börn sín á leikinn.

„Margar af stelpunum eru að spila í bestu deildum í heimi. Þær eru miklar fyrirmyndir og gaman að fylgjast með þeim.“

Stelpurnar halda svo til Slóvakíu þar sem liðið mætir heimakonum á sunnudag.