Hefur safnað íslenskum leir í 30 ár

Ég hef gert við leirmuni fyrir fólk í nokkur ár og hef safnað þeim sjálfur í þrjátíu ár. Þetta var orðið það mikið að ég komst ekki fyrir á eldhúsborðinu með þetta,“ segir Þorvaldur Rúnar Jónasson, húsasmiður og safnari með meiru.

Rúnar safnar íslenskum leirmunum og á dágott safn af munum eftir Guðmund frá Miðdal, Fit og Funa og eftir Sigurð Arnórsson. Hann flutti nýlega viðgerðarverkstæðið af eldhúsborðinu heima hjá sér og niður á Kársnesbraut 114 í Kópavogi og ákvað þá að losa sig við eitthvað af munum. Rúnar hefur nefnilega ekki bara safnað leirmunum heldur á hann heljarinnar safn af húsgögnum, húsbúnaði, málverkum og fleiru. Hann opnar því verkstæði og verslun á morgun.

„Það er ofboðslega mikið til af alls konar hlutum, sem ég og fjölskyldan höfum ekkert að gera við. Það þarf að koma þessu út. Þetta hefur safnast að mér úr ýmsum áttum og sumt hefur legið í kössum í tuttugu ár. Mest eru þetta leirmunirnir en ég hef keypt þá víða, í Danmörku og Svíþjóð og úti í Bandaríkjunum. Svo veit fólk af þessum áhuga mínum og kemur ýmsu til mín. Það er gaman að stúdera þetta,“ segir Rúnar.

Íslenskir leirmunir eru talsvert í tísku þessa dagana og segist Rúnar fá mikið í viðgerð. „Unga fólkið er að koma með gamla hluti í viðgerð, sem legið hafa í geymslu í áratugi. Það er hægt að gera við nánast hvað sem er. Það snýst bara um þolinmæði,“ segir Rúnar.

En sér hann ekki eftir munum sem hann hefur safnað að sér í tugi ára?

„Ég á svo mörg stykki af sama hlutnum. Auðvitað er enginn hlutur eins af leirmunum en ég sé ekkert eftir þeim. Svo bætist alltaf aftur í hjá mér. Ef ég læt einn þá fæ ég tvo til baka.“

Rúnar opnar formlega á laugardaginn milli klukkan 12 og 16. Eftir það verður opið part úr degi þrisvar í viku og verðu hægt að fylgjast með opnunartímum á Facebook