Flottar hugmyndir á blogginu skreytumhus.is

"Sumir segja að ég sé svolítið eins og Monica í Friends því þegar ég kem í heimsóknir kitlar mig í fingurna ef púðarnir eru í ólagi. Ég hef alltaf verið að breyta og skreyta og er þetta mitt aðaláhugamál,“ segir Soffía Dögg Garðarsdóttir sem er blómaskreytir að mennt.

Soffía Dögg heldur úti blogginu skreytumhus.is en þar skrifar hún um sniðugar hugmyndir fyrir heimilið og breytingar á ýmsum munum, hvort sem það eru húsgögn, smámunir eða heilu herbergin.

„Það er ekki nauðsynlegt að fara inn í einhverja hönnunarbúð til að gera fallega hluti og mér finnst skemmtilegast að gera mikið úr litlu. Sumir eru mjög vanafastir en það er mikil rómantísk endurvakning á heimilunum og fólk er að uppgötva að gefa gömlum munum nýtt líf.“ 

Hún segir kökudiska meðal annars vera sniðuga til annarra nota og fólk þurfi því að hugsa örlítið út fyrir kassann til að sjá möguleikana. „Ein kona getur fært öll húsgögnin í húsinu ef hún er með handklæði undir þau. Þá er einnig mjög gott að fara úr sokkunum,“ segir hún hlæjandi að lokum.