Tvær nýjar sýningar í Listasafni Íslands

Sýningin Leiðangur 2011 fjallar um Sísyfosarþraut tveggja þýskra listamanna, Thomasar Huber og Wolfgangs Aichner, þegar þeir draga rauðan bát yfir ríflega þrjú þúsund metra hátt fjallaskarð í Zillertal í Ölpunum niður á sléttur Ítalíu handan fjallgarðsins.

„Ásamt fararkostinum fylgja heimildir um þessa raun sem telja verður einstætt listrænt afrek, enda vakti það sérstaka athygli á listamönnunum á Tvíæringnum í Feneyjum,“ segir Halldór Björn Runólfsson, safnstjóri á Listasafninu.

„Verkið vekur spurningar um tengsl listar og náttúru, átök og sigra,“ heldur Halldór áfram. Sýningin samanstendur af málverkum, ljósmyndum, grafíkverkum, klippimyndum, bókverkum og vídeóinnsetningu.

Sýningin er undir stjórn Christians Schoen.

Kees Visser hefur átt langan feril í myndlist eins og sést á sýningunni Ups and Downs.. Ferill hans tengist náið þróun íslenskrar listar á 8. og 9. áratugnum þegar strauma hugmyndalistar og póstmódernisma gætti hvað mest.

„Yfirveguð og marksækin nálgun hans hefur að undanförnu aflað honum mikils álits í evrópskri list, þar sem hann er álitinn einn af eftirtektarverðustu fulltrúum geómetrískrar og hugmyndalegrar aðferðafræði,“ segir Halldór að lokum. Sýning Listasafns Íslands leitast við að veita yfirgripsmikla innsýn í feril Kees Visser.

Sýningarnar opna laugardaginn sjöunda september klukkan 11.