Segir ráðherrann spilla friði

Svandís Svavarsdóttir, þingmaður Vinstri grænna og fyrrverandi umhverfisráðherra, segir Ragnheiði Elínu Árnadóttur iðnaðarráðherra efna til ófriðar með yfirlýsingum sínum um að færa Norðlingaöldu úr verndunarflokki í virkjunarflokk.

Fyrir helgi heimsótti Ragn­heiður Elín Þjórsárver ásamt fulltrúum Landsvirkjunar og segist eftir ferðina sannfærðari en áður um að þann kost megi nýta til raforkuframleiðslu án þess að Þjórsárver skaðist. „Þetta er ekki bara hagkvæmur virkjunar- eða veitukostur heldur líka ákaflega umhverfisvænn, þar sem þarna er verið að nýta vatnið í Þjórsá með enn betri hætti en nú er gert með því að veita vatninu í gegnum enn fleiri virkjanir,“ segir hún.

Svandís segir þessi áform ráðherrans hins vegar á skjön við lög og þá sátt sem Alþingi hafi komið sér saman um. „Hún talar um það að þetta snúist um einhvers konar sátt en sáttin liggur nú þegar fyrir, þingið er búið að koma sér saman um hana. Það sem Ragnheiður Elín er að gera er að efna til ófriðar,“ segir Svandís.

„Norðlingaalda er í verndarflokki og það gildir einu hvað Ragnheiði Elínu finnst um það,“ segir Svandís enn fremur og bætir við að samkvæmt lögum beri Umhverfisstofnun að hefja friðlýsingaferli allra virkjanahugmynda sem séu í verndarflokki.

„Það vekur áhyggjur ef framkvæmdarvaldið virðir lagabókstafinn svo lítils að ráðherra telur sig geta í samvinnu við virkjunaraðila tekið virkjunarhugmynd úr verndarflokki og skellt henni í nýtingarflokk.“

Guðmundur Hörður Guðmundsson, formaður Landverndar, er með tilboð handa ráðherranum. „Þetta hefur greinilega verið árangursrík ferð en eflaust voru ekki öll sjónarmið með í henni,“ segir hann.

„Þannig að við bjóðum ráðherranum nú formlega í fossaferð svo hún geti séð Dynk, Kjálkaversfoss og Gljúfurleitarfoss sem allir hyrfu ef þessar hugmyndir gengu eftir. Í raun gefur Dynkur Gullfossi ekkert eftir svo ef menn vilja dreifa umferð ferðamanna þá er lítið mál að gera samgöngur í stakk búnar til að bera strauminn að Dynki. Það væri betri kostur en virkjun.“