Lundar veiddir á ný í Vestmannaeyjum

Bæjarráð Vestmannaeyja hyggst heimila lundaveiði á skipulagssvæði bæjarins frá 19.-31. júlí með mögulegu áframhaldi frá 6.-13. ágúst. Lundaveiðar hafa verið bannaðar í Eyjum síðustu ár vegna fækkunar í stofninum.

Í fundargerð bæjarráðs frá því á miðvikudag segir að ráðið heimili veiðarnar fyrir sitt leyti þar sem það deili þeirri skoðun bjargveiðimanna að mikilvægt sé að viðhalda menningu og hefðum í kringum bjargveiðar. Þó er tekið fram að lundastofninn verði að njóta vafans.

Georg Eiður Arnarsson er einn reyndasti bjargveiðimaður Vestmannaeyja. Hann segir lundastofninn viðkvæman en leggur áherslu á að veiðimönnum sé annt um stofninn. „Þetta er svipað og með bóndann sem yrkir jörðina. Hann hugsar að sjálfsögðu best um hana,“ segir Georg og bætir við að málflutningur Náttúrustofu Suðurlands um lundaveiðarnar hafi verið á villigötum.

Náttúrustofa Suðurlands sendi frá sér yfirlýsingu eftir fund bæjarstjórnarinnar. Þar segir að ekkert samráð hafi verið haft við stofnunina áður en ákvörðunin hafi verið tekin. Og enn fremur að viðkoma lundastofnsins í Vestmannaeyjum hafi síðustu ár verið minni en nemur viðhaldi stofnsins og því hafi veiðarnar verið ósjálfbærar.