Opið hús verðlaunað

Útvarpsleikhúsið hlaut fyrstu verðlaun á Norrænu útvarpsleikhúsverðlaununum sem fóru fram í Helsinki fyrir helgi.

Verðlaunin voru fyrir leikritið Opið hús en það er eftir Hrafnhildi Hagalín og í leikstjórn Kristínar Eysteinsdóttur. Verkið var jólaleikrit Útvarpsleikhússins en dómnefndir á Norðurlöndunum völdu milli sex norrænna verka þar sem Opið hús þótti bera af.

Þetta er í annað skipti á þremur árum sem Útvarpsleikhúsið hlýtur þessi verðlaun. Verkið fjallar um fimm persónur sem hittast í húsi sem er til sölu þegar haldið er opið hús.

Með hlutverk í leikritinu fara Kristbjörg Kjeld, Erlingur Gíslason, Bergur Þór Ingólfsson, Unnur Ösp Stefánsdóttir, Björn Thors og Ellert A. Ingimundarson. Hallur Ingólfsson samdi tónlistina við verkið en Einar Sigurðsson sá um hljóðvinnslu.