Arfurinn tekinn til kostanna á Kjarvalsstöðum

Yfir tvö hundruð málverk og höggmyndir eftir tæplega 40 listamenn verða til sýnis á sýningunni Íslensk myndlist 1900-1950: Frá landslagi til abstraktlistar, sem hefst á Kjarvalsstöðum á laugardag.

Eins og nafnið gefur til kynna er sýningin sögulegt yfirlit íslenskrar myndlistar frá fyrri hluta tuttugustu aldar. Sýningunni er skipt í fjórar frásagnir og jafn mörg tímabil, þar sem rýnt verður í hvað einkennir íslenska myndlist á hverjum tíma, tengsl þess við alþjóðlega listasögu, íslenskt samfélag og menningu.

Mörg verkanna á sýningunni hafa ekki komið fyrir augu almennings um langt árabil. Á sýningunni verða verk eftir listamenn á borð við Kjarval, Ásgrím Jónsson, Einar Jónsson, Jón Stefánsson, Nínu Tryggvadóttur, Louisu Matthíasdóttur, Þorvald Skúlason, Svavar Guðnason og Kristján Davíðsson.

Sýningarstjóri er Ólafur Kvaran en hann verður með leiðsögn um sýninguna á sunnudag. Sýningin stendur til 22. september.

Tímabilin sem tekin verða fyrir í sýningunni eru:

Rómantík og róttækni 1900-1930.

Landslag 1930-1950.

Maðurinn og umhverfi hans 1930-1950.

Nýróttækni og upphaf abstraktlistar 1940-1950.