Hefur sungið Wagner í fjórum heimsálfum

„Fólk er pínu smeykt við Wagner,“ segir Bjarni Thor Kristinsson söngvari, sem syngur með Sinfóníuhljómsveit Íslands á tónleikum í tilefni af 200 ára fæðingarafmæli Richards Wagner í Hörpu í kvöld. „Mörgum finnst tónlistin hans dálítið þung, án þess í rauninni að hafa kynnst honum almennilega. Það þekkja nefnilega allir einhver stef eftir hann úr einhverjum dömubindaauglýsingum í sjónvarpinu. Og brúðarmarsinn auðvitað. Fólk áttar sig oft ekki á því að hann er úr Lohengrin.“

En þú hefur verið að syngja verk hans lengi og víða, ekki satt?

„Já, ég er búinn að syngja ein ellefu Wagner-hlutverk í fjórum heimsálfum. Í Ameríku, Asíu, Ástralíu og úti um alla Evrópu í bráðum fimmtán ár.“

Og þú valdir verkin á þessa tónleika?

„Já, svona í samráði við hljómsveitina. Þetta eru sólótónleikar með mér og lá beint við að syngja þá tónlist sem ég hef mitt lifibrauð af, um leið og við erum auðvitað að heiðra minningu Wagners á 200 ára fæðingarafmælinu.“

Bjarni Thor er staddur á Keflavíkurflugvelli þegar í hann næst, hvaðan er hann að koma?

„Ég var að koma frá Köln þar sem standa yfir lokaæfingar á óperu Mozarts, Brottnáminu úr kvennabúrinu, sem verður frumsýnd á sunnudaginn kemur. Þarf svo að fljúga þangað aftur strax eftir tónleikana með Sinfóníuhljómsveitinni. Það var svolítið púsl að ná þessu en það tókst sem betur fer þótt þetta sé ansi knappt.“

Þú verður þá feginn þegar frumsýningin í Köln er afstaðin?

„Já, ég viðurkenni það að þegar þessi vika er búin verður þungu fargi af mér létt,“ segir Bjarni Thor.

Tónleikarnir í kvöld bera yfirskriftina Uppáhalds Wagner og það er eins og áður sagði Bjarni Thor sem hefur valið verkin sem flutt verða, en efnisskráin samanstendur af forleikjum og aríum sem eru þó aðeins brot þeirra hlutverka úr óperum Wagners sem hann hefur sungið um heim allan á liðnum árum. Petri Sakari er stjórnandi hljómsveitarinnar á þessum tónleikum en hann hefur verið tíður gestur við stjórnvöl hennar allt frá því árið 1988 þegar hann tók við aðalhljómsveitarstjórastöðunni. Hann gegndi þeirri stöðu til 1993 og síðan aftur á árunum 1996-1998, en í millitíðinni var hann aðalgestastjórnandi hljómsveitarinnar.