Ekkert að stressa okkur á veðurspánni

„Miðasalan gengur frábærlega og við erum ekki að stressa okkur á neinu,“ segir umboðsmaðurinn Ólafur Geir Jónsson, sem stendur fyrir Keflavík Music Festival.

Hátíðin hefst formlega í kvöld og lýkur á sunnudag. Veðrið hefur ekki verið að leika við landsmenn það sem af er sumri og á Suðurnesjum hefur það verið ansi slæmt að undanförnu. Því er vert að spyrja hvort einhverjar ráðstafanir verði gerðar fyrir gesti hátíðarinnar, en boðið er upp á þann möguleika að tjalda í Keflavík.

„Tónleikarnir verða ekki úti og fólkið verður inni í tjöldunum en ekki fyrir utan þau, svo við erum ekkert stressaðir. Veðrið skiptir engu máli,“ segir Óli Geir, pollrólegur yfir veðurspánni. Fjölmargir íslenskir og erlendir listamenn koma fram á hátíðinni.

Er ekki mikil spenna fyrir stóru nöfnunum?

„Jú, það er gríðarlega mikil spenna, sérstaklega þegar það er svona stutt í þetta. Fólk er oft lengi að taka við sér í miðasölu en núna er þetta að koma,“ segir Óli Geir.

Eins og Fréttablaðið hefur áður greint frá er von á spennandi tónleikasumri þar sem Frank Ocean, Deep Purple, Nick Cave og Band of Horses eru á meðal þeirra sem halda tónleika hér á landi. 

Það er því ljóst að margir verða að velja og hafna þegar kemur að tónleikunum, en eitthvað hefur borið á því að gestir hafi reynt að losa sig við miða á Keflavík Music Festival á Facebook og bland.is. 

Er þetta eitthvað sem þú hefur tekið eftir? 

„Nei, alveg alls ekki. Miðasalan hefur gengið vonum framar,“ segir Óli Geir og segir hátíðina vera búna að festa sig í sessi. „Þetta er í annað sinn sem við höldum þessa hátíð og hún er stærri og fjölbreyttari en fyrr, svo þetta er bara það sem koma skal. Svo er líka alltaf sól í Keflavík,“ segir Óli Geir léttur að lokum.