Náði 12.sæti í símakosningunni

Eyþór Ingi virðist hafa heillað Evrópubúa töluvert meira en dómnefndina þegar hann keppti með lagið Ég á líf í Eurovision nú um miðjan mánuðinn.

Eins og fór líklega ekki framhjá neinum komst Eyþór áfram úr undankeppninni og lenti í 17. sæti í aðalkeppninni í Malmö með 47 stig. Nú hafa aðstandendur keppninnar gefið út lista yfir það hvernig atkvæðin skiptust niður og margt þar sem kemur á óvart. Hin danska Emmilie de Forest stóð reyndar uppi sem sigurvegari bæði meðal dómara og óbreyttra Evrópubúa.

Það var þó dómnefndin sem dró Eyþór Inga niður í atkvæðagreiðslunni því eftir símakosninguna í aðalkeppninni sat hann í 12. sæti og var þar ofar á lista en Moldavía, Belgía, Svíþjóð, Georgía og Hvíta-Rússland sem öll lentu ofar en hann þegar atkvæðum dómnefndar hafði verið blandað saman við atkvæði Evrópubúa. Sérstaka athygli vakti hversu skiptar skoðanir voru um rúmenska framlagið. Hinn rúmenski Cezar lenti í 13. sæti með hið stórfurðulega lag It‘s My Life þrátt fyrir að Evrópubúar hefðu kosið hann í það sjöunda, þar sem hann lenti í því 24. hjá dómnefndinni.