Feðgar leika feðga

„Áhættan við að hrærast innan kvikmyndaiðnaðarins er fyrst og fremst tilfinningaleg. Þetta er nánast eins og að kynna barnið þitt fyrir eiturlyfjum,“ sagði leikarinn Will Smith um leiklistarferil sonar síns, Jadens Smith.

Feðgarnir leika saman í vísindatryllinum After Earth sem frumsýnd verður í Bandaríkjunum um helgina. Hinn fjórtán ára gamli Jaden Smith hefur áður leikið í myndinni The Pursuit of Happyness með föður sínum. „Maður leiðist ekki út í kvikmyndagerð vegna sjálfsánægju heldur vegna þess að maður vill gleðja aðra,“ sagði Will Smith um uppeldisaðferðir sínar.