Langflestir hafa séð Ófeig í bíó

Um sextán þúsund miðar hafa samanlagt selst á íslensku kvikmyndirnar fjórar sem hafa verið frumsýndar á þessu ári, eða XL, Þetta reddast, Ófeigur gengur aftur og Falskur fugl.

Langflestir hafa séð Ófeigur gengur aftur, eða hátt í 9.500 manns. Grínmyndin, sem Ágúst Guðmundsson leikstýrði með Ladda í hlutverki draugsins Ófeigs, var frumsýnd 27. mars og er enn í sýningum. Tekjur hennar nema hátt í þrettán milljónum króna.

Í öðru sæti er XL í leikstjórn Marteins Þórssonar með Ólaf Darra Ólafsson í aðalhlutverki með tæplega 3.000 selda miða. Hún var frumsýnd 18. janúar og er ekki lengur í bíó.

Þriðja vinsælasta myndin er Falskur fugl í leikstjórn Þórs Ómars Jónssonar. Samkvæmt tölum frá Samtökum myndrétthafa á Íslandi, Smáís, hafa rúmlega 2.000 manns borgað sig inn á myndina síðan hún var frumsýnd 19. apríl en hún er enn í sýningum.

Þetta reddast í leikstjórn Barkar Gunnarssonar rekur svo lestina með tæplega 1.800 manns. Hún var frumsýnd 1. mars og er sýningum á henni hætt.

Þessar aðsóknartölur eru langt fyrir neðan tvær vinsælustu íslensku myndir síðasta árs, Svartur á leik og Djúpið. Rúmlega 60 þúsund manns sáu þá fyrrnefndu og tæplega fimmtíu þúsund þá síðarnefndu.