Fátækragildra aldraðra

Ég er ein af þeim sem ekki er hrifin af kerfinu sem hefur verið til margra ára hjá Tryggingastofnun, um leið og ég kom þangað inn á 69. aldursári spenntist upp fátækragildra. Það er afskaplega áríðandi að þessu kerfi verði breytt, til hagsbóta fyrir notendur.

Ég segi fyrir mig, að hefði ég ekki fengið aðstoð góðra manna síðara hluta ársins 2012, hefði ég ekki haft í mig og á, það er afskaplega vond tilfinning að sjá ekki ljós framundan, koðna niður í fátækt og volæði, ég var farin að sjá fyrir mér gröfina og heyra í moldinni falla yfir mig. Þessi sífellda njósnaaðferð, fara inn á bankareikninga og sekta fólk er ekki mönnum bjóðandi. Mér líður eins og ég sé undir eftirliti lögreglu. Þessi upphæð sem fólk hefur leyfi til þess að vinna fyrir á ári er beinlínis hlægileg. Hvar er hægt að fá vinnu sem býður fóki 40 þúsund á mánuði? Staðan er óþolandi fyrir þá sem hafa ekkert nema lífeyri frá Tryggingastofnun og smávegis frá lífeyrissjóði sem er dregið frá lífeyrinum sem sífellt er verið að skerða.

Leita til hjálparsamtaka

Hvers vegna sækja svona margir ellilífeyrisþegar til hjálparsamtaka? Það er ekki eins og við eigum að þurfa að betla, fólk sem hefur lagt sitt til samfélagsins alla starfsævina. Það hafa ekki allir gengið menntaveginn og þar af leiðandi ekki þegið há laun fyrir störf sín um ævina, sbr. þá sem falla undir verkalýðsfélögin. Ég hef heyrt því fleygt að einhverjir geymi fjármuni sína í bankahólfum, jafnvel í útlendum bönkum. Það eru sjálfsagt til margar leiðir, sem venjulegt fólk þekkir bara ekki.

Hrunið setti strik í reikninginn fyrir margan manninn sem var t.d. að safna fyrir utanlandsferð eftir starfslok, eða eitthvað álíka, til að auðga andann, sem ekki er síður nauðsynlegt á efri árum. Ég setti til hliðar á sparireikninga og hávaxtasjóði sem fóru á hliðina. Ef það eru til stjórnmálamenn sem eru til í að taka þessi mál upp á sína arma, mun ég styðja þann flokk, og sjálfsagt margir fleiri. Heyrt hef ég utan að mér að fólk ætli ekki að ryðjast í hópum til þess að kjósa, og það er slæmt að nota ekki kosningaréttinn. Það gengur ekki þetta flókna kerfi sem viðgengst, sendandi fólki bréf frá stofnuninni, þar sem koma fram alls kyns skerðingar vegna þessa og hins, sem er líka ákaflega ruglandi.

Skattayfirvöld ættu að innheimta skattinn beint af okkur sem erum eitthvað að starfa, eða finna einhverja betri lausn.