Nýju brýrnar rísa brátt við Elliðaárósa

Framkvæmdir eru hafnar við göngu- og hjólreiðabrýr við Elliðaárósa. Reykjavíkurborg og Vegagerðin standa að framkvæmdinni sem er hluti af hjólreiðaáætlun Reykjavíkurborgar. Burðarvirki brúnna verður átján metra hátt og 40 metrar að lengd. Er haft á orði að brýrnar muni verða áberandi kennileiti í borginni til framtíðar litið og auki mikilvægi svæðisins með tilliti til útivistar. Verklok eru áætluð í sumarbyrjun. Arkitektarnir Hans-Olav Andersen og Sigríður Magnúsdóttir hjá Teiknistofunni Tröð teiknuðu brýrnar og sigruðu hönnunarsamkeppni Reykjavíkurborgar og Vegagerðarinnar. "Þríhyrndur grunnflötur er teygður uppí þrívítt form, hyrnu. Formið er dregið upp úr miðju flatarins af fjórða horninu. Bitarnir þrír tengjast saman í toppi hyrnunnar og tylla sér á einfaldar undirstöður við árbakkann. Þetta er burðarvirki brúarinnar sem ber lárétt þunnbyggt brúargólfið með stögum. Leitast er við að lágmarka efnisnotkun með því að gefa brúnni stöðugt grunnform, sem jafnframt er sérkenni brúarinnar. Elliðaárósabrýrnar mynda eina samfellda heild frá eystri bakka að vestari bakka. Brúargólfin eru samtengd með stíg sem sveigist eftir manngerðu landslagi Geirsnefsins og breikkar við áningastaði. Við áningastaði eru bekkir, hjólastandar, upplýsingaskilti, vatnspóstar ofl. Núverandi gönguleið á Geirsnefi er aðlöguð nýjum göngu- og hjólastíg,“ segir í lýsingu arkitektanna um mannvirkin.