Skíðaskálinn aftur í hendur fyrri eiganda

Skíðaskálinn í Hveradölum er aftur kominn í eigu Svavars Helgasonar eftir að félag sem keypti skálann í september síðastliðnum stóð ekki við greiðslur.

„Þetta er leiðindamál og það er verið að rifta þessu. Ég ætla bara að reka þetta áfram þangað til annað kemur í ljós," segir Svavar sem hefur verið með veitingasölu í Skíðaskálanum frá því 1995.

Fram kom í Fréttablaðinu í nóvember síðastliðnum að kaupendurnir, sem voru Inga Lísa Sólonsdóttir og Aron Þorsteinson, hygðu á mikla uppbyggingu við Skíðaskálann og stóreflingu ferðaþjónustu þar á svæðinu. Frá því kaupin voru frágengin hefur verið lagt þar í ýmsar framkvæmdir, til dæmis málningarvinnu, stígagerð og ýmsa jarðvinnu.

Meðal hugmynda sem settar voru fram í haust var uppbygging baðlónsins Viking Lagoon, gerð golfvallar og smíði þyrlupalls fyrir útsýnisflug. „Þessi fjárfesting er svokölluð gullnáma sem hefur verið afar vannýtt eða legið í dvala, gullnáma sem býður í raun upp á óendanlega möguleika," sagði í viðskiptaáætlun fyrir verkefnið.

Umsamið verð Skíðaskálans var 98,5 milljónir króna. Af þeirri upphæð greiddu Aron og Inga Lísa 9 milljónir út og áttu að borga 6,5 milljónir króna 7. janúar síðastliðinn en gerðu ekki. Þess utan áttu þau að greiða 650 þúsund krónur mánaðarlega af 82 milljóna króna láni sem hvíldi á fasteigninni.

„Mér þykir þetta mál allt mjög leitt. Vegna þess hvernig hlutirnir þróuðust var ekki hægt að halda verkefninu áfram," segir Aron Þorsteinsson aðspurður um málið.

Í Fréttablaðinu í nóvember kom fram að Aron og Inga Lísa væru hjón. Aron segir þetta rangt. Þau Inga hafi átt í sambandi um fárra mánaða skeið frá því um mitt síðasta sumar en því hafi verið lokið áður en sagt var frá málinu í Fréttablaðinu.

Sjálfur kveðst Aron hafa afsalað sér hlut sínum í félaginu þegar áðurnefnda greiðslu átti að inna af hendi í byrjun janúar. „Svavar Helgason hefur staðið vel við allt sitt og ég óska honum alls hins besta," segir Aron Þorsteinsson.