Færri slasast við störf eftir hrun

Alls var tilkynnt um 1.322 vinnuslys til Vinnueftirlitsins árið 2011 og þrjú dauðsföll vegna vinnuslysa. Árið 2007 voru tilkynningarnar um vinnuslys 1.919. Útköllin árið 2011 voru 53-60 prósent af því sem þau voru 2007-2008.

Munurinn skýrist helst af miklum samdrætti í byggingariðnaði, að því er segir í ársskýrslu Vinnueftirlitsins.

Þar kemur einnig fram að heildarfjöldi skoðana og heimsókna í fyrirtæki árið 2011 hafi dregist saman um 21 prósent miðað við árið á undan. Eftirlitsmönnum í fyrirtækjaeftirliti hefur fækkað um þriðjung á síðustu þremur árum vegna sparnaðar.

Slysin sem tilkynnt eru til Vinnueftirlitsins eru hins vegar aðeins brot af þeim fjölda vinnuslysa sem tilkynntue er til Slysaskrár Íslands en þau voru 5.386 árið 2011. Árið 2007 voru þau 7.297.

„Slysin sem tilkynnt eru til Vinnueftirlitsins eru þau sem valda fjarveru í að minnsta kosti einn dag. Ef fólk er ekki frá vinnu vegna slyss á vinnustað er tilkynnt um slysið til heilbrigðiskerfisins, það er slysaskrárinnar,“ segir Gísli Níls Einarsson, sérfræðingur í forvörnum hjá VÍS.

Hann segir að stjórnendur fyrirtækja eigi að horfa fram á við í öryggismálum en ekki í baksýnisspegilinn. Þeir þurfi að greina hætturnar í vinnuumhverfi og starfsemi í tíma áður en slys verður. Gísli Níls kveðst kalla eftir annarri sýn í þessu samhengi.

„Stjórnendum ber að skipuleggja öryggismálin með fyrirbyggjandi aðgerðir í huga en ekki bregðast fyrst við þegar í óefni er komið. Fjöldi námskeiða og fræðsla um öryggismál, fjöldi eftirlitsferða á vinnustaðnum, fjöldi skráninga á næstum því slysum auk endurskoðunar á áhættumati eru dæmi um aðra mælikvarða sem atvinnurekendur geta nýtt til að meta árangur sinn í öryggismálum starfsmanna.“

Slysum meðal kvenna hefur lítið fækkað en slysum meðal karla hefur fækkað verulega í öllum flokkum frá 2007, að því er kemur fram í ársskýrslu Vinnueftirlitsins. Frá 2009 hefur ekki orðið frekari fækkun slysa og segir í skýrslunni að það verði að teljast verulegt áhyggjuefni. Árið 2011 slösuðust 879 karlar og 443 konur.

Vinnueftirlitið og VÍS halda opna ráðstefnu um ábyrgð, hlutverk og sýn æðstu stjórnenda í öryggismálum föstudaginn 22. febrúar.