Engin sprengja í Feneyjaskýrslu

Fenyjanefndin svokallaða hefur skilað Alþingi umsögn sinni um stjórnarskráfrumvarpið. Niðurstaðan hefur ekki verið gerð opinber.

„Sumu er hrósað og gerðar eru athugasemdir fram og til baka,“ segir Valgerður Bjarnadóttir, formaður eftirlits- og stjórnskipunarnefndar Alþingis. Samkvæmt upplýsingum Fréttablaðsins er engin stórsprengja í umsögn hinna erlendu sérfræðinga en heldur engin toppeinkunn gefin.

„Nefndarmenn hafa fengið skýrsluna í trúnaði en við ætlum að láta þýða hana áður en hún verður gerð opinber,“ segir Valgerður. „Okkur meirihlutanum í nefndinni finnst rétt að hafa skýrsluna á íslensku áður en við förum að fjalla um hana. Ég vona sannarlega að það verði fyrr en seinna.“

Vigdís Hauksdóttir, alþingismaður Framsóknarflokks og einn nefnarmanna, gagnrýnir trúnaðarbindinguna „Mér þykir það mjög skrítið að við skulum vera bundin trúnaði. Er ekki alltaf verið að tala um að allt eigi að vera uppi á borðum og gegnsætt?,“ spyr Vigdís. - gar