Vilja byggja nýjar laugar í Fossvogi og Vatnsmýri

Útilaug við Sundhöllina ætti að rísa á næsta ári og hverfislaug fyrir Grafarholt og Úlfarsárdal árið 2015. Fjórar laugar til viðbótar ætti að byggja í borginni á næstu ellefu árum. Þetta er tillaga þverpólitísks starfshóps á vegum borgarinnar um framtíðarsýn sundlauganna í Reykjavík, sem skilað hefur skýrslu um málið.

Aðrar laugar sem hópurinn leggur til að fjárfest verði í eru meðal annars innanhússlaug við Vesturbæjarlaugina og alveg nýjar sundlaugar í Fossvogi og Vatnsmýri. Þá ætti að mati hópsins að fjárfesta í hafnarlaug við Reykjavíkurhöfn og endurnýja laugarker við Laugardalslaugina.

Fjárfestingaáætlun hópsins er gerð í samræmi við drög að aðalskipulagi, og hann telur æskilegt að uppbygging sundlauga haldist í hendur við markmið skipulagsins, sem er að byggja borgina innan núverandi borgarmarka.

„Til lengri tíma litið fjölgar íbúum mest í nýju hverfi í Vatnsmýrinni þegar flugstarfsemi þar verður lögð af. Þar má gera ráð fyrir nýrri laug sem mun þjóna jafnframt stórum vinnustöðum á svæðinu, svo sem spítala og háskólum. Annað svæði sem gæti vaxið verulega til framtíðar er svæðið við Elliðaárvog,“ segir meðal annars í skýrslunni. „Miðað við forsendur aðalskipulagstillögu verður fjölgun íbúa í Grafarvogi og Úlfarsárdal, rúmlega þriðjungur allrar fólksfjölgunar.“

Til skemmri tíma litið eru svæðin í nágrenni við Vesturbæjarlaug, Sundhöllina og Laugardalslaug sögð líklegust til þess að vaxa, og helst þarf að bæta aðstæður í Vesturbænum. Meiriháttar viðhald er áformað í öllum þessum laugum.

Einnig er fjallað um markaðssetningu sundlauganna og fjölda gesta í skýrslu hópsins. Þar kemur fram að í fyrra voru gestir sundlauganna í Reykjavík rúmlega 1,8 milljónir. Markmið hópsins er að fjölga í þessum hópi um 170 þúsund gesti. Þá hafa tæp 30 prósent þeirra erlendu ferðamanna sem koma til borgarinnar farið í sund, eða um það bil 158 þúsund ferðamenn. Takmark borgarinnar er að helmingur allra ferðamanna sæki laugarnar meðan á heimsókn þeirra stendur.