Vignir besti maður liðsins

Fyrsta stórmóti íslenska landsliðsins í handbolta undir stjórn Arons Kristjánssonar lauk fyrr en flestir höfðu vonað. Liðið getur vissulega kennt einhverjum um að hafa verið fórnarlamb aðstæðna í A-riðlinum sem þýddi að Frakkar urðu mótherjar liðsins í sextán liða úrslitunum í stað Þýskalands, Brasilíu eða Túnis.

Frakkarnir voru einfaldlega númeri of stórir fyrir íslensku strákana sem stóðu sig samt mjög vel og stríddu frönsku vélinni sem landaði að lokum naumum sigri eftir spennuleik.

Það reyndi svo sannarlega mikið á Aron þjálfara á fyrsta móti. Það er ekki auðvelt að taka við af Guðmundi Guðmundssyni, sigursælasta þjálfara Íslands frá upphafi, en að auki missti liðið lykilmenn eins og Alexander Petersson og Arnór Atlason auk þess sem Ólafur Stefánsson gaf ekki kost á sér.

Miklar breytingar urðu á vörninni og hægri skyttustaðan var nánast skilin eftir bitlaus. Endurskipulagning varnarinnar tókst vel og sóknarleikurinn batnaði með hverjum leik þrátt fyrir afar lítið framlag úr hægri skyttustöðunni, einni af bestu stöðum landsliðsins í mörg ár.

Ásgeir Örn Hallgrímsson fékk það stóra próf að taka við af Ólafi og Alexander. Hann stóð sig vel varnarlega og á mikið í velgengni liðsins þar en kolféll hins vegar sóknarlega og fyrir vikið var ójafnvægið mikið í uppstilltum sóknarleik íslenska liðsins.

Blaðamenn Fréttablaðsins hafa valið Vigni Svavarsson besta leikmann íslenska liðsins á mótinu en hann kom mjög sterkur inn í íslensku vörnina í forföllum Ingimundar Ingimundarson og Alexanders Peterssonar.

Það var einkum innkoma Vignis sem gerði það að verkum að glæný vörn íslenska liðsins varð svona árangursrík. Vignir fékk að margra mati alltof fá tækifæri í liðinu undir stjórn Guðmundar Guðmundssonar en sýndi mátt sinn og megin í þessum sex leikjum á Spáni.

Þá má ekki gleyma framlagi Vignis í hraðaupphlaupunum en hann var með 11 mörk og 7 stoðsendingar án þess að spila sóknarleikinn.

Fleiri leikmenn stóðu sig mjög vel, aðrir skiluðu sínu en nokkrir þurfa að spila betur ætli landsliðið sér að komast lengra. Hér á síðunni má sjá dóma Fréttablaðsins yfir frammistöðu strákanna okkar á Spáni.