Risaverkefni bíður í Barcelona

Ísland mætir Frakklandi í 16 liða úrslitum heimsmeistaramótsins í handbolta á sunnudaginn í Barcelona. Óvæntur sigur Þjóðverjar gegn Ólympíu- og heimsmeistaraliði Frakka í gær gerði það að verkum að Frakkar enduðu í öðru sæti og mæta þar Íslendingum, sem enduðu í þriðja sæti B-riðils. Öruggur 39-29 sigur Íslands gegn Katar var alltaf skylduverkefni fyrir íslenska liðið en tapið gegn Rússum í fyrsta leiknum í riðlinum reyndist dýrkeypt þegar uppi var staðið.

„Við unnum þrjá leiki af fimm. Og ég er ánægður með sigurleikina en það vantaði aðeins meiri skynsemi í sóknarleikinn gegn Rússum. Og sóknarleikurinn í fyrri hálfleik gegn Dönum var góður. Rússaleikurinn var lykilleikur og við erum í þeirri stöðu að mæta Frökkum og við því er ekkert að gera," sagði Aron Kristjánsson þjálfari í gærkvöld.

Það var stórfurðulegt að horfa á leik Dana og Makedóníumanna í gær, þar sem Makedónía gat valið sér mótherja með því að tapa leiknum. Með sigri hefði Makedónía farið upp fyrir Ísland í þriðja sæti og mætt Frökkum, en Þjóðverjar yrðu mótherjar Makedóníu ef liðið tapaði. Kiril Lazarov og félagar hans í Makedóníu héldu spennunni í gangi fram eftir síðari hálfleik en þetta var leikur sem þeir ætluðu sér aldrei að vinna. Danir höfðu betur, 33-30, og kom það engum á óvart.

„Það er alltaf skrýtið að upplifa svona leiki – en þetta er nokkuð sem handboltinn glímir við, það er bara einn leikstaður í riðlunum og ekki hægt að láta alla leikina fara fram á sama tíma. Sem væri besta lausnin," sagði Aron Kristjánsson, þjálfari Íslands, þar sem hann horfði á lokasekúndurnar í leik Frakka og Þjóðverja á sjónvarpsskjá í aðstöðu fréttamanna.

„Frakkar eru ekki óskamótherjinn – við höfum sagt það áður," sagði Snorri Steinn Guðjónsson, sem skoraði 4 mörk úr 6 tilraunum. Við verðum bara að taka því og gera það eins vel og hægt er. Það vita það allir að Frakkar eru sigurstranglegri í þeim leik. Við reynum að taka það jákvæða með okkur og mætum hressir í 16 liða úrslitin.

Leikurinn gegn Katar í gærkvöld í San Pablo-höllinni fer ekki í sögubækurnar fyrir tilþrif eða snilldarhandbolta. Það tók íslenska liðið um 15 mínútur að hrista lið Katar af sér, og 10 marka sigur var síst of stór.

Aron Kristjánsson þjálfari leyfði yngri leikmönnum að spreyta sig í síðari hálfleik þegar ljóst var að sigurinn var í höfn. Aron sýndi þeim mikið traust í riðlakeppninni. Markvörðurinn ungi Aron Rafn Eðvarðsson er reynslunni ríkari, sem og þeir Arnór Þór Gunnarsson og Ólafur Gústafsson, svo einhverjir séu nefndir. Aron er án efa að horfa lengra fram í tímann og styrkir þar með leikmannahópinn fyrir Evrópumeistaramótið í Danmörku 2014 – ef liðið kemst þangað.