Spánverjar vilja fá gull

Heimsmeistaramótið hefst klukkan 18.00 í kvöld. Heimamenn, Spánverjar, taka þá á móti Alsír í Madríd. Spánverjar eru með geysisterkt lið og eru sigurstranglegastir hjá veðbankanum Betfair. Frakkar og Króatar koma þar á eftir og loks Danir.

Mikil pressa er á spænska landsliðinu að landa heimsmeistaratitlinum á heimavelli. Valero Rivera er búinn að þjálfa liðið í fjögur ár og hefur ekki enn komið liðinu í úrslit á stórmóti.

„Við höfum verið nálægt því að fara alla leið undanfarin ár en þetta tækifæri er sögulegt," sagði Rivera en hann segir að drápseðlið hafi vantað í sitt lið á ögurstundum.

„Við erum með marga sterka leikmenn og það er mismunandi hvaða menn taka af skarið. Hópurinn er nógu sterkur til þess að fara í gegnum svona gott mót en það hefur vantað ýmislegt á úrslitastundu," sagði Rivera en hann stefnir á gull með sínu liði.

„Í fyrsta skiptið erum við sigurstranglegasta liðið og það mun hjálpa okkur að vera á heimavelli. Frakkar eru samt meistarar og með ótrúlegt lið. Danmörk og Króatía eru líka afar sterk og svo má ekki gleyma liðum eins og Þýskalandi, Rússlandi og Póllandi."