Hefur ekki tölu á tattúunum

„Ég var tvítug þegar ég fékk fyrsta húðflúrið en ég var ótrúlega heilluð af tattúum og bara tattú-menningunni. Þegar maður var yngri þá var þetta allt svo dularfullt því maður vissi lítið um húðflúr, en mér hefur alltaf fundist þetta vera ótrúlega spennandi,“ segir Linda Mjöll Þorsteinsdóttir.

Linda er sú íslenska kona sem hefur flest húðflúr og hún sér um skipulagningu hátíðarinnar Icelandic Tattoo Convention ásamt eiginmanni sínum Össuri Hafþórssyni. Hátíðin hefst í dag og stendur yfir til laugardags í portinu hjá Bar 11, Hverfisgötu 18.

Linda Mjöll segir þau hjónin ekki vera húðflúrara þótt þau hafi flúrað hvort annað. „Maður þarf að hafa listina í sér. Þegar ég kynntist manninum mínum fór allt í gang en þá var ég einungis með tvö húðflúr. Ég hef flúrað lítið hjarta á manninn minn og ég ber eiginhandaráritun hans.“

Aðspurð segist hún ekki geta talið húðflúrin sem hún ber sjálf. „Það eru hreinlega allir útlimir húðflúraðir á mér. Ég get bara ekki talið þau og segi því alltaf að ég sé með fjögur stykki. Það er einfaldara. Fyrir mér er pínulítill lífsstíll sem fylgir þessu, sem skapar bæði jákvæða og neikvæða athygli en ég finn mest fyrir jákvæðum straumum,“ segir hún glöð í bragði.

Icelandic Tattoo Convention leggst vel í hana eins og áður fyrr. „Við verðum með risa veislutjald í portinu sem er upphitað og kósý. Þetta verður eins og ein stór tattústofa. Það eru átján erlendir húðflúrarar sem mæta og annað áhugafólk um húðflúr og list og það eru allir velkomnir að kíkja við.“