Fáðu já vinnur til verðlauna í Tallin

Stuttmyndin Fáðu já vann til verðlauna á ráðstefnu þrjátíu Evrópuríkja sem nú stendur yfir í Tallin. Ráðstefnan er liður í samstarfi um netöryggisáætlun Evrópusambandsins en Ísland er meðal þeirra ríkja sem starfa eftir þeirri áætlun. SAFT heldur utan um það starf fyrir hönd íslenskra stjórnvalda.

Fáðu já hlaut fyrstu verðlaun í flokknum „Myndbönd og fræðslumyndir" og var gerður góður rómur að henni. Fulltrúi SAFT, Hrefna Sigurjónsdóttir, framkvæmdastjóri Heimilis og skóla, tók við verðlaununum fyrir Íslands hönd.

„Við dreifðum myndinni til samstarfsfélaga okkar á ráðstefnunni og vakti hún verulega athygli. Nú þegar er mikill áhugi á Norðurlöndunum fyrir að nýta myndina í fræðslu um kynlíf, klám og Internetið og hafa fleiri Evrópuþjóðir einnig áhuga."

Fáðu já er liður í vitundarvakningarátaki stjórnvalda sem fram fer í tengslum við samning Evrópuráðsins um varnir gegn kynferðislegri misnotkun og misneytingu á börnum. Myndin hefur verið sýnd í velflestum grunnskólum og framhaldsskólum og er markmiðið að stuðla að umræðu og fræðslu um mörkin milli kynlífs og ofbeldis.

„Aldrei of seint að breyta heiminum"

„Það er mikill heiður að myndin skuli hafa fengið þessa viðurkenningu á alþjóðavettvangi," segir Halla Gunnarsdóttir, formaður verkefnisstjórnar um vitundarvakninguna. "Það sýnir að við erum á réttri braut hér á landi í viðleitni okkar til að sporna af öllum mætti gegn kynferðislegu ofbeldi gegn börnum, þar með talið því ofbeldi sem á sér stað unglinga í milli."

Hugmyndasmiðir myndarinnar, Brynhildur Björnsdóttir, Páll Óskar og Þórdís Elva eru að vonum ánægðir með viðurkenninguna. „Við vonumst til þess að boðskapur Fáðu já breiðist út um veröldina og að önnur lönd sjái hag sinn í því að endurgera myndina, svo hún geti talað beint til fólks á hverjum stað. Það er aldrei of seint að breyta heiminum."