Óánægja meðal lækna og læknanema

Mikil óánægja ríkir meðal íslenskra lækna og læknanema. Íslenskir læknar búsettir erlendis geta ekki hugsað sér að snúa aftur heim og læknanemar hafa ekki áhuga á að starfa á Landspítalanum að námi loknu.

142 læknar búsettir erlendis skrifuðu undir yfirlýsingu sem heilbrigðisráðherra var afhent á fimmtudag. Þar kemur fram að það sé afar erfit tilhugsun fyrir sérfræðilækna og nema erlendis að snúa heim í þá óvissu sem nú ríkir á Landspítalanum. Þorbjörn Jónsson, formaður læknafélags Íslands, segir að þetta sé mikið áhyggjuefni. Læknaflótti hafi blasað við frá árinu 2009 en að á síðustu tveimur árum hafi vandamálið stigmagnast.

Ef litið er til könnunar sem gerð var meðal læknanema kemur í ljós að aðeins 7,8% nema sem útskrifast á næstu tveimur árum geta séð Landspítalann fyrir sér sem sinn framtíðarvinnustað. Læknanemar segja svartsýni smita útfrá sér og horfa ekki fram á að vilja starfa á Landspítalanum að námi loknu. Þá segja þau segja íslenska lækna mjög eftirsótta erlendis þar sem kaup og kjör eru mun betri.