Líður eins og dómskerfinu sé bara sama

„Þegar það er verið að beita fólk ofbeldi þá verður það hrætt. Streitan er mikil og það er auðvelt að gleyma smáatriðum,“ segir Thelma Ásdísardóttir, einn af forsvarsmönnum Drekaslóðar, fræðslu- og þjónustumiðstöðvar fyrir þolendur ofbeldis og aðstandendur þeirra.

Henni þykir sýknudómur Héraðsdóms Suðurlands í heimilisofbeldismáli, sem Fréttablaðið greindi frá í gær, sorglegur. Þá var karlmaður sýknaður af því að hafa veitt eiginkonu sinni áverka á höndum og baki þótt hann hefði játað brotið að hluta.

Í niðurstöðu dómsins segir að framburður konunnar hafi ekki verið nægjanlega stöðugur og því var hann sýknaður af öllu brotinu. Orðrétt segir í dóminum:

„Þá gætir talsverðs ósamræmis í framburði brotaþola fyrir dómi og hjá lögreglu, bæði um það með hvaða hætti ákærði eigi að hafa slegið hana í handlegginn og hvernig hún hafi fengið umrædda áverka á handlegg.“

Læknir bar einnig vitni í málinu en í framburði hans segir meðal annars:

„[V]itnið F læknir sagði áverka á vinstri upphandlegg brotaþola hafa verið dreifða og taldi vitnið þau hafa verið eftir endurtekin högg eða klípingar. Áverkarnir hefðu samræmst því að slegið hefði verið á upphandlegginn eða gripið þéttingsfast um hann.“

Maðurinn játaði brotið að hluta til. Orðrétt sagði hann: „Ég var dauðadrukkinn og lét illa, sló að ég hélt eða greip mjög fast í framhandlegg hennar en ekki upphandlegg…“

„Það er ekki svo oft sem einstaklingar játa heimilisofbeldi,“ segir Thelma. „Maður hefði haldið að þá væri greið leið að sakfella þá fyrir brot sín,“ bætir hún við. 

Hún segir það fráleitt að hegna konunni fyrir framburð sinn. „Það er eðlilegt að hún sé ekki með þetta á hreinu,“ segir Thelma um vitnisburð konunnar, sem að lokum varð til þess að dómari áleit konuna missaga.

Aðspurð um þolendur heimilisofbeldis sem leiti til Drekaslóðar og reynslu þeirra af réttarkerfinu svarar Thelma:

„Það eru gegnumgangandi mikil vonbrigði með dómskerfið. Margir upplifa vantrú og einnig að reynsla þeirra og ofbeldi sem þeir urðu fyrir sé léttvægt fundið. Svolítið eins og öllum sé bara sama.“