Fékk svikapóst sendan frá póstfangi danska skattsins

Ung kona fékk bréf frá danska skattinum í morgun þar sem því var lofað hún fengi 25 þúsund íslenskar krónur endurgreiddar frá danska ríkinu. „Ég hélt að þetta væri svona tax refund," segir konan sem Vísir ræddi við en hún segist hafa farið til Danmerkur í helgarferð fyrir allnokkru og tengdi því póstinn við þá ferð.

Það runnu þó á hana tvær grímur þegar hún sá að hún var beðin um allar kortaupplýsingar, persónuupplýsingar auk þess sem hún var beðin um leyninúmerið sem er aftan á greiðslukortinu.

Hún segir að pósturinn hljóti að vera svikapóstur en hann sé engu að síður ákaflega blekkjandi og auðvelt að falla fyrir bragðinu. Póstinn fékk hún í gegnum póstfangið refusion@skat.dk.

Konan átti eftir að láta lögreglu vita af póstinum, en fólk er beðið um að vera á varðbergi gagnvart svona póstum, sem og öðrum svikamyllum sem þeim gætu borist í póstformi.