Hreinskiptar viðræður milli Sigurðar Inga og Maríu Damanaki

Viðræður Sigurðar Inga Jóhannssonar sjávarútvegs- og landbúnaðarráðherra við Maríu Damanaki, sjávarútvegsstjóra ESB voru hreinskiptar en vinsamlegar.

Þetta kemur fram í tilkynningu en fundur þeirra ráðherrans og sjávarútvegsstjórans fór fram í gær í Reykjavík. Meginmál fundarins var staða mála í  deilu Íslands, Færeyja, Noregs og ESB um nýtingu makrílstofnsins í Norðaustur Atlantshafi.

Sjávarútvegsstjórinn óskaði fyrir fáum dögum eftir fundinum, sem ráðherrann varð fúslega við. Áttu þau hreinskiptnar en vinsamlegar viðræður um vandann sem hlutaðeigandi ríki standa frammi fyrir og útskýrði sjávarútvegs- og landbúnaðarráðherra málstað Íslands. Bæði lögðu áherslu á nauðsyn þess að ná samkomulagi um sjálfbæra nýtingu á þessum verðmæta fiskistofni.

Sjávarútvegs- og landbúnaðarráðherra lagði í því efni þunga áherslu á að samkomulag yrði að byggjast á viðurkenningu gagnaðila á ríkum rétti Íslands vegna mikillar makrílgengdar í íslenskri efnahagslögsögu. Urðu sjávarútvegs- og landbúnaðarráðherra og sjávarútvegsstóri ESB ásátt um að leita allra leiða til að samningaferlinu verði fljótlega fram haldið, að því er segir í tilkynningunni.