Efast um ábata íslensku krónunnar

Þórarinn G. Pétursson, aðalhagfræðingur Seðlabanka Íslands, ritar grein í Fréttablaðinu í dag þar sem hann segist efast um ábata íslensku krónunnar til lengri tíma.

Telur Þórarinn upp margvíslegan kostnað sem fylgir því að hafa eigin gjaldmiðil, sérstaklega í litlu opnu hagkerfi. Segir hann beinan kostnað af því að þurfa að skipta úr einum gjaldmiðli í annan í milliríkjaviðskiptum geta numið um fimm til fimmtán milljörðum króna á hverju ári.

„Íslenskt fjármálakerfi er jafnframt ákaflega smátt og dýrt í rekstri. Markaðsaðilar eru fáir, velta er tiltölulega lítil og kostnaður við að stunda viðskipti er hlutfallslega hár. Þannig eru t.d. einungis þrír markaðsaðilar á gjaldeyrismarkaði og mismunur kaup- og sölutilboða u.þ.b. tvö- til þrefalt hærri en meðal annarra þróaðra ríkja. Þetta endurspeglast í meiri gengissveiflum hér á landi og hærri innlendum vöxtum," skrifar Þórarinn, og bætir við að rannsóknir bendi til þess að miklar gengissveiflur geri fyrirtækjum erfiðara um vik að hasla sér völl á alþjóðlegum mörkuðum.

„Bætt hagstjórn mun gera okkur kleift að nýta betur kosti sveigjanlegs gengis eigin gjaldmiðils og draga úr kostnaði við að reka svo smátt myntkerfi. Það breytir þó ekki því að áfram mun fylgja því nokkur kostnaður og þótt vissulega muni koma tímabil þar sem sveigjanlegt gengi getur auðveldað aðlögun í kjölfar áfalls er ábatinn til lengri tíma ekki augljós. Spurningin um krónuna verður því áfram til staðar."

Grein Þórarins í heild sinni.