Klyfjaður af sterum og stinningarlyfjum

Tollverðir ráku upp stór augu þegar þeir opnuðu töskur ellilífeyrisþega sem kom til landsins frá Taílandi með ekkert í farangrinum annað en stera og stinningarlyf. Var með sjötíu þúsund steraskammta. Yfirtollvörðurinn man ekki eftir öðru eins.

„Þetta var alveg með ólíkindum,“ segir Kári Gunnlaugsson yfirtollvörður um íslenskan ellilífeyrisþega sem var gripinn í tollinum í Leifsstöð seinni partinn á sunnudag með um sjötíu þúsund skammta af sterum í farangrinum.

Kári segist hreinlega ekki muna eftir öðru eins. „Ég held að við höfum aldrei tekið svona mikið í einu áður,“ segir hann um sterasmyglið.

Maðurinn, sem er 68 ára – fæddur árið 1945 – var með tvær töskur meðferðis, eina stóreflis ferðatösku og svokallaða flugfreyjutösku sem hann hafði í handfarangri.

Í hvorugri töskunni var hins vegar arða af hefðbundnum farangri, heldur voru þær báðar sneisafullar af ólöglegum lyfjum. Efnin voru af ýmsu tagi og á ýmsu formi – töflur, ampúlur, lyfjahylki og auk þess sprautunálar.

Maðurinn var að koma alla leið frá Taílandi, þar sem hann dvelur þorrann úr árinu. Hann er hins vegar ekki með lögheimili þar ytra og þarf því ferðast úr landinu reglulega til að fá endurnýjað landvistarleyfi. Þau ferðalög nýtir hann í heimsóknir hingað til lands.

Í kjölfar þess að maðurinn var handtekinn á sunnudag gerði lögreglan á Suðurnesjum húsleit á heimili hans hér í borginni og fann þar umtalsvert magn af ólöglegum lyfjum til viðbótar, aðallega stinningarlyfjum.

Þá segir auk þess í tilkynningu frá tollinum að maðurinn hafi áður gerst brotlegur við lög. Hann hafi nýlega reynt að smygla til landsins 800 töflum af stinningarlyfinu Kamagra.

Einn skammtur af Kamagra mun kosta þrjú til fimm þúsund krónur á svörtum markaði. Það má því ljóst vera að hefði smyglið heppnast hefði maðurinn getað haft vel upp úr sölunni.

Það þykir einmitt ljóst að efnin hafi meira og minna verið ætluð til sölu, enda um gríðarmikið magn að ræða, auk þess sem það var orðað svo við blaðamann að það væri ekki beint að sjá á manninum að hann hefði neytt mikilla stera. stigur@frettabladid.is