Lítið sést til grútarblautra arna í Kolgrafafirði í dag

„Við höfum séð yfir 20 erni í dag," segir Róbert Arnar Stefánsson, forstöðumaður Náttúrustofu Vesturlands. „Nokkra höfum við séð af löngu færi en svo virðist sem að þeir séu í sæmilegu ástandi."

Róbert er nú staddur í Kolgrafafirði, þar sem hátt í fimmtíu þúsund tonn af síld drapst í desember á síðasta ári og aftur nú í byrjun febrúar. Hætta er á að ernirnir fái fitu úr síldinni í fiðrið. Það hefur þó lítið sést til grútarblautra arna.

„Við sáum einn í dag sem var með eitthvað á sér, en það virtist nú ekki vera mikið," segir Róbert. „Það er ómögulegt að segja til um framhaldið en við vonum það besta."

Þá segir Róbert að óvíst sé um árangur þeirra hreinsunarstarfa sem standa yfir í Kolgrafafirði nú.

„Þetta er tilraunverkefni og ég veit ekki hversu miklu við munum ná. En aðstæðurnar eru þannig að þeir eiga í hættu á að fá þetta í sig," segir Róbert að lokum.