"Ótrúlega ósmekklegt og ömurlegt grín"

Skólastjóri Verzlunarskóla Íslands segist í fyrstu hafa talið að nemendur annars framhaldsskóla hefðu staðið fyrir umdeildum ratleik sem fjallað hefur verið um á Vísi í dag.

„Ég hef ekki hugmynd um hverjir standa á bakvið þetta. Ég heyrði þetta bara í dag og er að reyna að finna út úr þessu," segir Ingi Ólafsson skólastjóri Verzlunarskóla Íslands.

Umræða hefur skapast á samfélagsmiðlinum Facebook um reglur úr ratleik sem nemendur í Verzló stóðu fyrir á dögunum. Hrafnkell Ásgeirsson, formaður nemendafélagsins, staðfesti við Vísi fyrr í dag að um einn bekk væri að ræða.

Ingi segir sín fyrstu viðbrögð við tíðindum dagsins hafa verið þau að hann hafi talið að um nemendur í öðrum skóla væri að ræða.

„Ég vissi að nemendur í þeim skóla voru í ratleik í dag," segir Ingi. „Svo var ég að heyra það að þetta er eitthvað sem er eldra þannig að grunur, skilst mér, beinist að einhverjum bekk í skólanum," segir Ingi.

Málið er í rannsókn hjá Inga sem segir einu skipta hvort um nemendur Verzlunarskóla Íslands eða annars skóla sé að ræða.

„Alveg sama hvort það sé einhver í Verzlunarskólanum eða öðru skóla þá er þetta ótrúlega ósmekklegt og ömurlegt grín," segir Ingi.

„Ég hef ekki komist til botns í þessu máli. Ég er að reyna að finna út hverjir standa á bak við þetta og vita hvort það sé einhver í skólanum," segir Ingi.

Samkvæmt samtölum undirritaðs við nemendur í Verzlunarskóla Íslands er algengt að bekkir í skólanum fari í ratleik, hver fyrir sig, á árshátíðardaginn.