Skuldir sveitarfélaganna hafa þrefaldast

Starfsfólk Íslandsbanka hefur að undanförnu unnið að kortlagningu á stöðu íslenskra sveitarfélaga og verður skýrsla um stöðu þeirra gerð opinber á morgun, en fréttastofa Stöðvar 2 hefur hana undir höndum.

Hrun fjármálakerfisins, og ekki síst krónunnar, hefur haft verulega mikil áhrif á fjárhagsstöðu sveitarfélaga samkvæmt skýrslunni, en á tíu árum hafa skuldir þeirra þrefaldast, farið úr tæplega 200 milljörðum í tæplega 600 milljarða.

Þarna munar ekki síst um miklar skuldir dótturfélaga sveitarfélaga, eins og Orkuveitu Reykjavíkur, en skuldir fyrirtækisins nema ríflega þriðjungi af öllum skuldum sem sveitarfélög landsins eru í ábyrgðum fyrir.

Í skýrslunni er fjallað ítarlegar um tekjustofna sveitarfélaga og starfsumhverfi í hverjum landshluta. Sérstaklega er horft til starfsgilda á hverja hundrað íbúa.

Þau eru 5,7 á höfuðborgarsvæðinu, 4,9 á Suðurnesjum, 6,6 á Vesturlandi, 7,4 á Vestfjörðum, 8,2 á Norðurlandi Vestra, 7,8 á Norðurlandi eystra, 7 á Austurlandi og 6,3 á Suðurlandi.

Það sem ekki síst skiptir máli, hvað þessar tölur varðar, er að töluverð fækkun hefur verið á íbúum margra minni sveitarfélaga, á meðan fólki hefur fjölgað á höfuðborgarsvæðinu. Þrátt fyrir fólksfækkun mælist atvinnuleysi í litlum sveitarfélögum í mörgum tilfellum lítið.