Ætli það endi ekki með því að leikmenn mæta með sinn bolta

Knattspyrnufélag ÍA ætlar ekki að spila með boltann sem lagt er til að spilað verði með í Pepsideild karla í sumar. Formaður samtaka efstudeildarliða segir gagnrýnina meira í formi gífuryrða en ekki byggða á faglegum grunni.

Íslenskur toppfótbolti, samtök efstudeildarliða, samþykkti á dögunum að spilað yrði með knettinum sem er frá Adidas í efstu deild karla í sumar.

Boltinn er af gerðinni, Confederation Cup 2013 og er B-týpan í þeim flokki. Leikmenn nokkurra liða hafa á undanförnum dögum lýst yfir óánægju sinni með boltann og hefur samskiptavefurinn Twitter verið vinsælasti vettvangurinn til þess.

Formaður íslensks toppfótbolta segir að sú gagnrýni sem sett hafi verið fram hingað til hafi verið í formi upphrópana og byggð á fátæklegum grunni.

„Gífuryrði er nú yfirleitt ekki mjög djúp og vitur. Mér hefur fundist fara lítið fyrir faglegri gagnrýni," segir formaðurinn Jón Rúnar Halldórsson.

En nú hafa Skagamenn gengið skrefinu lengra og ákveðið að spila ekki heimaleiki sína í sumar með boltanum umdeilda.

„Þessi bolti er bara eftirlíking af keppnisboltanum og við viljum ekki spila með eftirlíkingar. Annað hvort spilum við bara með alvöru týpuna eða bara með Nike boltann áfram, ekki þessum. Þetta er bara bolti sem ég myndi gefa frænda mínum," segir Ingi Fannar Eiríksson, formaður knattspyrnudeildar ÍA.

Jón Rúnar segir að vel komi til greina að endurskoða málið ekki síst í ljósi ákvörðun forráðamanna ÍA.

„Sé sú ákvörðun, sem var tekin, sannanlega röng, þá breytum við bara því. En ég held líka að þetta sé soldið komið þannig að ansi margir sem hafa haft uppi mikil gífuryrði, miklar skoðanir, yfirleitt án þess að hafa nokkuð á bakvið sig, ég held að það sé erfiðara fyrir þá að snúa við. Ætli þetta endi ekki á því að hver leikmaður mæti með sinn bolta, það eru þeir sem hafa mesta vitið á því skilst mér," segir hann að lokum.